राज्यपाल सी. विद्यासागर राव यांची प्रमुख उपस्थिती कृष्णा अभिमत विद्यापीठाचा शुक्रवारी दीक्षांत सोहळा 558 विद्यार्थ्यांना होणार पदवी प्रदान

कराड, (लक्ष्मीपुत्र ) -  कृष्णा वैद्यकीय विज्ञान अभिमत विद्यापीठाचा 8 वा दीक्षांत सोहळा शुक्रवार दिनांक 10 मे रोजी सकाळी 10 वाजता विद्यापीठाच्या प्रांगणात आयोजित करण्यात आला आहे. या सोहळ्यासाठी प्रमुख पाहुणे म्हणून महाराष्ट्राचे राज्यपाल सी. विद्यासागर राव उपस्थित राहणार असून, कृष्णा अभिमत विद्यापीठाचे कुलपती डॉ. वेदप्रकाश मिश्रा अध्यक्षस्थान भूषविणार आहेत.

या सोहळ्याला कृष्णा चॅरिटेबल ट्रस्टचे अध्यक्ष डॉ.सुरेश भोसले, कृष्णा विद्यापीठाच्या कुलगुरू डॉ.सौ. नीलिमा मलिक आदी मान्यवरांसह व्यवस्थापन मंडळाचे सदस्य आणि अभ्यास मंडळाच्या सदस्यांची प्रमुख उपस्थिती असणार आहे. या सोहळ्यात विद्यापीठाच्या विविध अधिविभागातील 558 विद्यार्थ्यांना पदवी प्रदान करुन सन्मानित करण्यात येणार असल्याची माहिती विद्यापीठाचे कुलसचिव डॉ. एम. व्ही.घोरपडे आणि परीक्षा नियंत्रक डॉ. सौ. आर. के.गावकर यांनी प्रसिद्धीपत्रकाद्वारे दिली आहे.

याबाबत प्रसिद्धीस देण्यात आलेल्या पत्रकात पुढे म्हटले आहे, की स्थापना सहकारमहर्षी जयवंतराव भोसले (आप्पा) यांनी कृष्णा चॅरिटेबल ट्रस्टच्या माध्यमातून सुरू करण्यात आलेल्या कृष्णा वैद्यकीय विज्ञान संस्थेची केली. ग्रामीण भागातील जनतेला मोफत व माफक दरात उच्च दर्जाच्या वैद्यकीय सुविधा मिळाव्यात आणि ग्रामीण भागातील विद्यार्थ्यांना गुणवत्तापूर्ण आरोग्य शिक्षण मिळावे, या उद्देशाने या संस्थेची स्थापना करण्यात आली. 1982 साली जयवंतराव भोसले यांनी कृष्णा हॉस्पिटल व वैद्यकीय संशोधन केंद्राची स्थापना केली. त्यानंतर1983 साली कृष्णा नर्सिंग विज्ञान संस्थेची व1984 साली कृष्णा वैद्यकीय विज्ञान संस्थेची स्थापना करण्यात आली. 2005 साली कृष्णा वैद्यकीय विज्ञान संस्थेला अभिमत विद्यापीठाचा दर्जा बहाल करण्यात आला. स्व. जयवंतराव आप्पांची दूरदृष्टी आत्मसात केलेल्या डॉ. सुरेश भोसले यांनी केवळ भारतातच नव्हे तर परदेशातही कृष्णा अभिमत विद्यापाठाचा नावलौकिक पोहचविला आहे.

कृष्णा विद्यापीठाच्या माध्यमातून नागरिकांना पुरविल्या जाणार्‍या या उच्च गुणवत्ताप्राप्त आरोग्य सोयीसुविधांमुळेच विद्यापीठाला ‘नॅक’चे‘ए’ श्रेणीचे अव्वल मानांकन, तसेच ‘आयएसओ’मानांकन प्राप्त झाले आहे. विद्यापीठाशी संलग्न असणार्‍या कृष्णा हॉस्पिटल व वैद्यकीय संशोधन केंद्राला ‘एनएबीएच’चे राष्ट्रीय मानांकन लाभले आहे. कृष्णा हॉस्पिटलमधील बालरोग विभागाच्या अतिदक्षता कक्षाला भारतीय राष्ट्रीय नवजात मंचाचे (नॅशनल निओनॅटल फोरम ऑफ इंडिया)मानांकन मिळाले आहे. रूग्णालयाच्या रक्तपेढीला‘एनएबीएच’ या राष्ट्रीय संस्थेचे मानांकन लाभले असून, कृष्णा वैद्यकीय विज्ञान संस्थेच्या रोगनिदान प्रयोगशाळेलाही ‘एनएबीएल’ या राष्ट्रीय संस्थेकडून मानांकन मिळाले आहे.

गुणवत्तापूर्ण व्यवस्थापन पद्धती, एकाच छताखाली उपलब्ध असलेली उच्च शैक्षणिक सुविधा आणि बहुवैशिष्ट्यपूर्ण आरोग्य व रोगनिदान सेवा या वैशिष्ट्यांबद्दल ख्यातकीर्द असणार्‍या कृष्णा अभिमत विद्यापीठाच्या यंदाच्या8 व्या दीक्षांत सोहळ्यात विद्यापीठातील मेडिसिन अधिविभाग (276), नर्सिंग (114), दंतविज्ञान(86), फिजिओथेरपी (58) आणि अलाईड सायन्स अधिविभाग (24) अशा पाच अधिविभागांतून एमबीबीएस, एमएस, बीडीएस,एमडीएस, बीपीटीएच, एमपीटीएच, बी. एस्सी.नर्सिंग, एम. एस्सी. नर्सिंग, एम. एस्सी.बायोटेक्नॉलॉजी, एम. एस्सी. मायक्रोबायोलॉजी पदवी प्राप्त केलेल्या एकूण 558 विद्यार्थी-विद्यार्थीनींना पदवी प्रदान केली जाणार आहे.यापैकी 14 विद्यार्थ्यांना पीएच.डी. पदवीने सन्मानित करण्यात येणार आहे. तसेच विशेष गुणवत्ताप्राप्त विद्यार्थ्यांना विविध 20 पुरस्कारांचे वितरण करुन गौरविण्यात येणार आहे, अशी माहिती कुलसचिव डॉ. एम. व्ही. घोरपडे आणि परीक्षा नियंत्रक डॉ. सौ. आर. के. गावकर यांनी दिली आहे.